About Author
هنادي
9 followers

Author Popular Articles

كيف تحترف الاكسل للمبتدئين الجزء الأول

تعلم الاكسل في البدايه تعتقد انه فعلا صعب، لان المشهور عنه انه برنامج للحسابات وانا مش بحب الرياضه يبقي مش لازم اعرفه، لكن انا جاي اقولك ان الفكر ده غلط تماما، مفيش حد فينا دلوقتي مش بيحتاج  البرنامج ده خاصه هذه الايام، واحب اطمنك انه مش حتحتاج تتعلم حاجات كثير علي الاقل في البدايه .

اوعدك ان بعد اول درس حتلاقي نفسك حابب تكمل فيه ثاني، لان اللي بيعتمد عليه مش بيقدر يتعامل من غيره بعد كده.

يلا بينا نبدا مع بعض وانت متحمس.

ايه المطلوب علشان نبدأ نتعلم:

1. كمبيوتر او لاب توب .

2. تشوق للعلم والمعرفة.

3. مج نسكافيه او كوبايه القهوة.

ويلا بينا نبدا علي بركة الله.

ملحوظه: ممكن تستخدم الموبايل بس ده مش بيبقي مريح عند بدايه التعلم ولكن بعد كده ممكن نستعمله علي الموبايل بسبعد ما نكون فهمنا ايه هو الاكسل وكيفيه العمل عليه.

حنعرف ايه في الاكسل بقي :

1. كيف اوصل للاكسل علي الكمبيوتر .

2. محتويات ملف الاكسل.

a. شكل الصفحة.

b. الفئات المختلفه.

c. اسماء الاعمده والصفوف .

d. مسمي الخليه.

3. اغلاق ملف الاكسل.

اولا: كيفيه فتح الاكسل:

حنروح لقائمة بدأ start   ومنها نروح للبرامج all program ومنها لبرامج المايكروسوفت  Microsoft office وبعدها نختار اكسل الجداول البيانات  excel .

ندوس عليها فيفتح معانا البرنامج اكيد لحد دلوقتي مفيش اي مشكله فيها صح كده .

ثانيا : محتويات الاكسل :

ايه بقي اللي بنشوفه لما نفتح الاكسل؟

1: شكل الصفحة:

صفحة بيضاء مسطره مستطيلات صح كده ده اللي ظاهر عندك .

الصفحة البيضة دي اسمها ورقه عمل  work sheet .

الصفحه موجود فيها خطوط بالطول والعرض، الخطوط الطوليه تسمي اعمده  Colum والخطوط بالعرض اسمها صفوف  row ونتيجه تقاطع الطول مع العرض ظهرت مستطيلات .

المستطيلات الموجوده دي اسمها خلايا يعني الواحده منها اسمها خليه cell.

لحد كده هل في اي مشكله ؟

سمعاكم وانتوا بتقوا مفيش اسهل من كده.

علي فكره الخطوط اللي انت شايفها دي وهميه.

يعني ايه وهميه يعني في الحقيقه مش موجودة، هي بس ظاهره لك انت بس علشان تساعدك في الكتابه .

مش مهمة المعلومة دي دلوقتي حتعرفها بعد كده بس قلت اقولهالك دلوقتي علشان تعرف وعلشان ما تحس انها غريبه لما اقولهالك بعد كده ثاني.

2 : الفئات المختلفه داخل الملف:

1. يوجد اسفل الصفحه  حاجه اسمها sheet 1 او ورقه عمل 1 .

وبيكون اما موجود ورقة عمل واحدة او 3 علي حسب اصدار الملف اللي انت بتتعامل به .

2. في اعلي الصفحه فوق في القوائم الرئيسيه اللي بنتعامل عليها .

 

3. في كل قائمة من دي جواها قوائم فرعيه علشان تساعدنا في البيانات سواء التنسيق او الربط او نقل واو اظهار البيانات .

 3 :اسماء الاعمده والصفوف :

وزي ما كل واحد فينا له اسم هنا برده كل حاجه لها اسم، يعني ايه مش فاهم ؟

افهمك يعني كل عمود له اسم، بجد؟ ايوه اسمه هو الحرف الموجود فوق كل عمود  يعني مثلا العمود الاول اسمه A،والعمود الثاني اسمه B.

طب العمود العاشر اسمه ايه؟

فكرت.... عرفت .... برافو عليكم اسمه J

نسال كمان مره، العمود ال 15 اسمه ايه؟

قدامك 5 ثواني وترد شاطرين العمود اسمه O

وبنفس المنطق عندنا الصفوف لها اسماء، ليه هي الاعمدة احسن منها ولا ايه؟ برده الصفوف لها اسماء، بس الاختلاف ان الصفوف اسمائها عباره عن ارقام مش حروف، وبرده بتكون اول الصف سواء يمين لو عربي او شمال لو انجليزي.

لو قلنا الصف الاول اسمه ايه ؟ اكيد 1 طيب الصف الثاني يبقي 2

لو سالتك الصف ال 15 اسمه ايه ؟ يا تري حتعرف ترد !

طبعا حيبقي الرد وهي دي محتاجه تفكير طبعا 15.

 4: مسمي الخليه :

يعني ايه مسمي الخليه ؟

الخليفه لو وقفت علي اي واحدة منهم حتلاقيها بتعلم علي اول العمود من فوق واول الصف من الشمال او اليمين علي حسب هو مفتوح عربي ولا انجليزي صح؟
طبعا كلنا لقينا ان ده اللي حاصل فعلا، طيب لو قلنا احنا عاوزين كل واحد يقول اسم الخليه اللي واقف عليها حيقول ايه، طبعا مش عارف  عندك حق لان لسه ما قلت لك حتسميها ازاي.

احنا اتفقنا ان الخليه بينور عندها امتدادها فوق اللي هو اسم العمود وكمان امتداد اول الصف.

واتفقنا علي اسماء الاعمده والصفوف، ده بقي حيوصلنا لاسم الخليه.

زي ما انت بتقول اسمك وبعدين اسم والدك برده الخلية بتقول انا كمان اسمي حيبقي ثنائي.

اسم الخليه حيبدا باسم العمود وبعدين اسم الصف، يعني ايه ده كده الموضوع حيبدا يتعقد بقي، لا ما تخافش خالص.

حنبدأ الأسم بالحرف وبعدين بالرقم. برده احنا مش بنفهم كده عاوزين مثال، لو قلت لك اقف علي اول خليه عندك، حتلاقي ايه اللي نور ؟

العمود نور A والصف نور 1 ، يبقي كده اسم الخليه الاولي  ايه A1.

لو كررناها ثاني ورحنا للخلية الثانيه في اول صف، اسمها ايه؟

نركز مع بعض ونشوف ايه الآسماء اللي نورت حنلاقي العمود B والصف 1.

يبقي كده اسم الخلية B1.

المره دي السؤال لك انت حاول تفكر فيه. روح اقف علي الخلية الاولي في الصف الثاني، اسمها ايه؟

حسيبك تفكر شويه ... اوعي تبص علي الاجابه لحد ما تشوف وفكر ....

فكرت وعرفت واكيد وصلت ان الخليه اسمها A2، برافو عليك شاطر .

نجرب كمان مره  الخليه الثالثة في الصف الخامس .

سهلة ما تقلق روح بص عليها، حتشوف الاول العمود وبعدين الصف.

تمام سامع الكل بيقول C5 . برافو عليكم كمان مرة واخر مره علشان اللي ما عرف يعمل اللي فاتت يبدا معانا في دي.

الخليه العاشرة في الصف ال 25.

ما تتخضش روح عند الأعمدة وعد 10 اعمده وبعدين ننزل علي الصفوف لحد 25،حتلاقي نفسك واقف علي خليه.

اسمها ايه؟

الكل يحاول، تمام بس في ناس مش بترد، بس حستني 5 ثواني كمان ..... الخلية اسمها J25

اظن ان لحد هنا مفيش اي مشكله .

 

نراجع مع بعض مراجعه سريعة اللي فات.

الاكسل عباره عن ملف عمل داخله ورق عمل، وكل ورقة عمل فيها اعمدة وصفوف والتقائهم ينتج عنه خلايا وعرفنا ازاي بنسمي كل خليه .

 حنعرف حاجه بسيطه كمان ويبقي الحصه الاولي خلصت .

ازاي نقفل الملف اللي فتحناه ؟

ثالثا : كيفية اغلاق الملف:

نضغط علي الاكس الموجود في بدايه الصفحة فوق، وقتها حيظهر لو عاوز تحفظ اللي عملته ولا لا تريد حفظه وده طبعا حسب اختيارك، اللي هو طبعا ايوة احفظ الملف .

نسجل اسم الملف علشان نكمل شغلنا عليه تبقي عارف اسمه، حنسميه باسمك .

كل واحد يكتب اسمه علي الملف وما تنساش ان ده حيبقي اول انتاج لك في الاكسل، علشان كده حيكون باسمك.

ده بس علشان الملف ده اللي احنا حنتعلم عليه لكن انت مش مجبر تحفظ اي تعديلات براحتك، لكن لو حابب تكمل معانا يبقي لازم تسمع الكلام وتحفظه .

كده ده يبقي اول درس لنا في تعلم الاكسل .

اتمني انه يكون سهل ومفيش  مشكله عليه ويكون الفكر اللي عندك مخوفك منه يبقي راح او قل شويه .

وان شاء الله مع الوقت حتلاقي نفسك بتحب الاكسل وتدور علي الجديد كمان .

التعليقات

يجب تسجيل الدخول لإضافة تعليق

مقالات ذات صلة