ازيكم عاملين ايه ؟يا تري الملف اللي كنا فتحناه المره اللي فاتت معاك ولا ما سمعتش الكلام وما حفظتوا ؟
ولو ما حفظت الملف ارجع للدرس الاول وافتح ملف جديد ويلا بينا نبدا الدرس الجديد .
واللي سمع الكلام يرجع للملف اللي كان باسمه علشان كل واحد كان مسميه باسمه مش كده ولا ايه؟
المهارات:
1.الكتابه علي الاكسل .
2.عمل جدول في شيت الاكسل .
3.عمليات حسابيه علي الاكسل .
a.معادلات الجمع علي الاكسل .
دلوقتي قدامك ورقه بيضاء مفتوحه .
1. الكتابه علي الاكسل .
طيب حنكتب ازاي ؟
نقف علي اي خلية , يعني ايه نقف عليها ؟
يعني نضع الماوس عليها ونعمل كليك شمال , يبقي كده وقفنا علي الخلية ونقدر نكتب اللي احنا عاوزينه.
طبعا دلوقتي احنا بقينا نعرف اسماء الخلايا .
يعني اقولك روح لخلية A1, واكتب الآسم.
وبعدين ندوس علي enter علشان ننزل للخليه اللي بعدها .
نكتب في خلية A2 بابا ,ننزل علي الخلية اللي تحتها ونكتب ماما , ثم هشام ثم هدير .
طبعا احنا ممكن نكتب اي اسماء بس علشان يبقي المثال واحد واحنا بنكمل عليه بعد كده, علشان ما يحصل لغبطة .
نرجع ثاني لخلية B1 ونكتب رقم التليفون.
ننزل للخلية اللي تحتها ونكتب اي ارقام للاربع اسماء.
تمام كده حيبقي عندنا الشكل ده :
كيفيه عمل جدول في الاكسل :
طب عاوزين نعمل في شكل جدول بدل ما هي عامله كده.
نعمل ايه بقي , هي ملها بقت مكلكعه كده ليه , لا ما تقلق دي حاجة سهلة ما تخافش.
هنا حنبدا نستخدم القوائم الرئيسية اللي موجودة فوق .
نروح لقائمة insert ومنها نختار منها table يعني جدول , حيظهر قدامك جدول صغير وتعمل علامه صح علي البند الموجود فيها .
ده معناها بيسال هل الجدول عنده رؤوس بيانات فبنوافق عليها
شايفين المدي بتاع الجدول بدأ من أول A1 لحد B5 !
كده بقي ظهر عندك جدول فيه الاسماء وأرقام التليفونات .
هو في اي صعوبه لحد دلوقتي ؟
اعتقد ان الموضوع سهل لحد الان .
فهمنا من كده ايه ان ممكن نكتب بيانات يعني حروف وبيانات ارقام , الاكسل بيقبل كل البيانات .
طيب نبدأ نزود الحاجات اللي بتتميز به الاكسل , وهي الحسابات يعني الجمع والطرح والضرب والقسمة وهكذا .
اضيف عمود كمان ونكتب في C1 المرتب.
اكتب اللي بنقول عليه ما تكسلوش.
نبدأ نحط مبالغ أمام كل اسم , حنحط الارقام دي 5000 ثم 4000 ثم 1500 للاسمين الاخريين .
لو قلنا ان اول حاجه عاوزينها اننا نعرف اجمالي دخل الاسره كام ؟
3.عمليات حسابيه علي الاكسل :
يبقي حنبدا نتعرف علي حاجه اسمها معادلة , يعني ايه معادله ؟ هي مبدئيا اي حسابات تتم علي مجموعة ارقام .
يعني لو رياضيا عاوزين نعرف دخل الاسره حنعمل ايه :
حنجمع المرتبات لكل فرد منهم يعني { 5000 + 4000+ 1500+1500} دول حيساوي 12000 جنيه .
لحد كده مفيش اي حاجه جديدة , ولو عاوزين نطبق الكلام ده علي الاكسل نعمل ايه .
مبدئيا كده اي حاجه حتتعامل معاها علي انها مساله يبقي حنحط علامة = قبل اي حاجه حنكتبها .
احنا مش بنفهم الا بمثال وانا معاكم , يلا بينا نعمل المثال اللي فات علي شيت الاكسل بتاعنا , يعني ايه شيت ؟ يعني ورقه العمل اللي بنشتغل عليها .
حنروح نقف علي خلية C6 , طبعا احنا عرفنا يعني ايه نقف علي الخلية , يعني نحرك الماوس لعندها ونعمل كليك شمال علي الخلية دي .
نكتب كما يلي :=5000+4000+1500+1500 وبعد اخر رقم نعمل enter
وبعد ما تعمل enter حتلاقي ظهر عندك الرصيد الاجمالي 12000 .
شفتوا ازاي ان مفيش حاجه صعبة , عملنا معادلة ولا اسهل من كده مفيش .
هو يعني ده كده كل الاكسل يعني ؟ لا طبعا بس دي تعتبر اول معادلة نفتتحها في الاكسل .
وزي ما اتعودنا مع بعض ان احنا بندرب علي الحاجه اكثر من مره فحنجرب الجمع مرة ثانيه لحد ما نحس ان احنا فهمناه , ونقدر ننفذه لوحدنا .
حنكتب في خليه A6 اجمالي المرتبات.
علشان ما يتلغبط مع الارقام الجايه .
نقف علي A7 طبعا خلاص موضوع الوقف علي الخلية اصبح شئ سهل جدا .
نكتب فيها , اجمالي راتب الام والاب .
اللي مركز معايا حيقول ايه المطلوب نعمله دلوقتي , لو قلنا رياضيا عندنا مرتبات الاب والام همه 5000 و 4000 علي التوالي .
علشان نعرف اجماليها حنقول 5000+4000 حيساوي مبلغ 9000
طيب نطبقها ازاي علي الاكسل ؟ مين حيفكر كده ويقول .
فكروا ... اكتبوا علي الخلية C7 ......عرفتوا حتكتبوا ايه ولا لسه مستنين ؟
سبنا وقت نفكر فيه دلوقتي حنقول الحل حنكتب =5000+4000 وبعدها نعمل enter حيظهر كام ؟
حيظهر 9000 مظبوط .
التدريب الاخير : مطلوب اجمالي مرتب هشام وهدير .
من غير شرح كثير احنا خلاص عرفنا حنعمل ايه .
حنسيب 5 ثواني وبعدين تبص علي الحل .
نكتب =1500+1500 وفي النهاية حيكون الناتج 3000 ونكتب امامها اجمالي هشام وهدير .
a. معادلات الجمع علي الاكسل :
طيب هي الطريقه اللي فاتت دي تفرق ايه عن لما اكتبها علي ورقة او اعملها في دماغي وخلاص .
حقولك لا اللي فات يعتبر تمهيد لطريقه العمل الاساسيه علي الاكسل , يعني المهم انك تفهم الاساس وبعدين نبدأ نطور عليها واحدة واحدة .
وعلشان كده حنطور المعادلة اللي فاتت نكتبها بشكل جديد .
حنبدل الارقام لأسماء الخلايا , ازاي؟
احنا في المعادلة الاولي الآجمالي لكل الافراد كنا بنقول ايه =5000+4000+1500+1500
نبدلها باسماء الخلايا فحتكون :
=C2+C3+C4+C5
نروح نقف علي خلية D6 ونكتب المعادلة دي =C2+C3+C4+C5
حتلاقي ايه اللي حصل ان الخلايا اللي فيها الأرقام دي نورت واصبح علي كل خليه لون علشان يبان مكانها في المعادلة.
وبعد ال enter حيظهر معانا اجمالي المبالغ فعلا.
طيب حنزود معلومة كمان حتساعدنا علي سهولة عمل المعادلة بدل ما اكتبها بايدي , ازاي؟
حنكتب = وبعدين نروح نقف بالماوس علي الرقم الاول اللي عاوزين نجمعه حنلاقي انه نور زي ما كنا بنكتب المعادلة باسماء الخلايا .
نكمل ونكتب + وبعدين نروح نقف علي الرقم الثاني اللي حيتجمع وبعدين + ثاني ونروح نقف علي الرقم الثالث وبعدين + ونروح للرقم الرابع وحتدينا نفس النتيجه .
نفس النتيجه بس بصوره اسهل من غير ما اكتب المبالغ بنفسي ولا من غير ما اكتب الخلايا بنفسي واتلغبط وانا بكتب الرموز ولا اي حاجه مجرد بشاور بالماوس علي الخليه المطلوبه .
برده ندرب عليها مره ثانيه في اجمالي مرتب الام والاب حنعمل ايه .
نقف علي خلية D7 ونكتب = وبعدين نروح نقف علي خليهC2 وبعدين نكتب +ونروح بالماوس علي خلية C3 وبعدها نعمل enter.
طبعا حتطلع لنا نفس النتيجه المطلوبه واللي ظهرت معانا في اول طريقه.
نرجع نجرب علي المعادلة الثالثه .
اجمالي مرتبات هشام وهدير , حنعمل ايه بقي ؟
فكروا 5 ثواني وبعدين شوفوا الحل .
حنكتب =C4+C5
وحنوصل لنفس النتيجة , اكيد بعد التدريب الاخير اصبح الموضوع سهل .
ملخص : تلخيص للي اخذناه انهاردة , اتعلمنا ازاي نكتب علي الاكسل سواء نص او ارقام وبعدين تدرجنا للمعادلات وعرفنا نعمل معادلات الجمع علي الاكسل وادربنا عليها شويه .
ولحد هنا حنقفل الملف ونحفظ التغيرات اللي تمت علي الملف , اوعي تقفل وتنسي تحفظ التغيرات اللي عملناها علي الملف .
وان شاء الله نتقابل في الدرس الجاي ويارب يكون الاكسل لحد دلوقتي ساهل معاكم .
يجب تسجيل الدخول لإضافة تعليق